SANTA CRUZ DE VAL

Agonda firgojecho ithias 1859 vo tache adim suru zata. 1883 vorsak ek tornnatto ani umedin bhorlolo yadnik aplem pavl Agonda ganvant dovorta anik tea disa te atam passun Agonda firgoj vaddot, fulot anik pikall zait asa.

Bhagevont Anna amche firgojechi askarin. Tiche bhair amchea purvozanim anik ek vhoddle dennem amkam dovorla ‘Santa Cruz de Val’ vo ami sogllim taka mogan ani opurbaien ‘Milagricho Khuris’ mhunnon pachartat.

Oxem sangtat ki ho khuris doria deger sampoddlo. Hi khobor khup gazli. Aplea ganvcho khuris doriant lotton Agonda pavla mhunn somzun Cavelossim thaun lok ailo tea Khursak vhorunk. Tannim Ho Khuris vhorunk tozvit keli, bandlo vhoddlo pun Khuris halona zalo. Tedna dusro upai na zaun Agonda lokan Ho Khuris aplea ganvant dovorlo anik taka dovrunk ek lhan thikan toiar kelem. Ho Khuris eke vatten bhagovlolo asa, sangtat ki taka vhoddun ani duklun vhortale tedna Khuris eke vatten bhagovlo mhunnon. Hi khobor 1859 vorsa zali.

Amche render anik karvi bhav zaum Kristanv vo Hindu hea khursak bhett korun aplea kamak vetat. Hea khursa lagim zaitim bhav-bhoinna magnnem korunk yetat. Tornatte yetat nokri magunk, logn zaloli yetat bhurgeache dennem magunk, Avoy-bapuy yetat aplea bhurgeank gheun. Hea khursache mozotin Devan tanchi magnnim aykoleat anik tankam axirvadan bhorleat, dekhun aiz hea khursak ‘Milagricho Khuris’ mhunnttat.

Hea khursa sovem aplo mog ani upkar dakounk zaite tornatte ani Agonda firgojentli bhav-bhoinna fuddem sorli hea khursak ek ghor bandunk. Sumar ek voros fattim ami suru kelolem kam sompot ailem. Hea khursak atam ek lhan pun sobit ghor bandla. Sumar 10 lakh-acho khorch zalo. Pun ho vaur suru kela te atam passun ho vaur sompounk duddvanchi kednach oddchon zali na. Aplea sovem kelolea upkara khatir zaitea bhavam-bhoinnani udar monan dengi dili. Amchea ganvchea anik dusrea ganvchea bhavartea vorvim ho vaur sompeponnim amchean korunk zalo.

Atam sanje velar thoim vochun magnnem korunk, ogeponnan vel sarunk, Devan rochlolea sobit sundor doria anik dongrachi toknai korunk ek bori sondhi ani soeg mellta.

Hea vorsak poilech pavtt tin disanchi novena korun Mai mhoinneache 13ver, 2011, sanje 5.00 horar porbheche Mis bhettoitole.

Bhov Povitr Khursa amche khatir Deva lagim vinoti kor!